Ўзбекистонда автомобилларга талаб 30 %га ошган

Иқтисодий тадқиқотлар маркази (CЕРР) тарқатган маълумотларига кўра сўнги 2 йил ичида аҳолининг автомобилларга бўлган талаби 29,6 % га ошган.

 

Ҳисоботда айтилишига кўра, 2021 йилнинг июн ойида автомобилларга бўлган талаб 2020 йилнинг июн ойига нисбатан 12,9 %га, 2019 йилнинг шу даврига нисбатан эса 29,6 %га ошган.

 

Энг юқори ўсиш суратлари Наманган (22,6%), Навоий (20,9%), Самарқанд (18,8%), Фарғона (16,2%) ва Тошкент (16,4%) вилоятларида қайд этилган.

Хусусан, 2021 йилнинг июн ойида 18,9 мингта янги автомобил рўйхатга олинди. Улардан 1171 таси (6,2%) чет элда ишлаб чиқарилган автомобиллардир. Чет элда ишлаб чиқарилган автомобиллар энг кўп сотилган ҳудудлар Тошкент шаҳри (янги автомобилларнинг 11,8%), Тошкент (5,7%), Самарқанд (3%) ва Хоразм (2,4%) вилоятлари бўлди.

Шунингдек, ўтказилган таҳлилллар автокредитлар ва автомобилларга бўлган талаб ўртасида сезиларли даражада боғлиқлик борлигини кўрсатди. Aвтокредитлар ҳажмининг 10%га ошиши рўйхатга олинган ва қайта рўйхатга олинган автомобиллар сонининг 4% га ошишига олиб келганини кўрсатди.

Бундан ташқари, юқорда келтирилган ўсиш суратлари ҳисобга олинганда, Ўзбекистон автомобил бозорига коронавирус таъсири минимал бўлганини қайд этиш мумкин. Пандемия йили 2020 йилнинг апрел ойида автотранспорт воситалари савдоси 73,8% га пасайган бўлса, йилнинг иккинчи ярмида бозорда ўсиш кузатилди. Якуний натижа – Ўзбекистонда 2020 йилда сотилган янги автомобиллар сони 276 мингдан ошди. 2019 йилда эса жами – 268 минг янги автомобил сотилган.G