30 noyabr kuni Toshkent—Abu-Dabi yo‘nalishi bo‘yicha Wizz Air aviakompaniyasi orqali BAAga uchib kelgan 31 nafar o‘zbekistonlik amirliklar hududiga kiritilmadi.
O‘zbekistonning Abu-Dabi shahridagi elchixonasi va Dubaydagi Bosh konsulxonasi vaziyatni nazoratga olib, aeroport maʼmuriyati bilan hamkorlikda yo‘lovchilarni ovqat va tibbiy yordam bilan taʼminlash choralarini ko‘rmoqda.
Maʼlumotlarga ko‘ra, ayollar, bolalar va keksalarga aeroportdan chiqib ketishga ruxsat berilgan, lekin 20–40 yosh oralig‘idagi erkaklar mamlakatdan chiqarib yuborilishi mumkinligi aytilmoqda. Fuqarolarning aytishicha, pasportlari olib qo‘yilib, izoh berilmagan holda uzoq vaqt kuttirilgan.
Elchixona vaziyatni hal etish uchun amirliklar mutasaddi idoralari bilan muloqotda ekanini maʼlum qildi. Sabablar haqida rasmiy bayonot berilmagan.