Президентга ҳоким ҳайдовчиси ва мактаб “замдиректор”и уста-ҳунарманд деб таништирилди
Фарғона вилоят ҳокимлиги ижтимоий тармоқларdа тарқалган шов-шувли хабарларга муносабат билдирди.
Шавкат Мирзиёев Фарғона вилоятига ташрифи давомида унга уста-ҳунарманд шогирд сифатида таништирилганлар ҳоким ёрдамчиси ва мактаб директори ўринбосари бўлиб чиқди.
Ижтимоий тармоқлар давлат раҳбарининг Фурқат туманидаги “Уста Юсуфжон наққош” оилавий корхонасида бўлганида олинган суратда президентнинг орқасида турган ўймакор шогирд либосидаги одам туман ҳокимининг ҳайдовчиси ҳамда президент билан мулоқот қилган яна бир уста тумандаги 21-мактаб директори ўринбосари экани ҳақида хабарлар тарқалди.
Фарғона вилояти ҳокимлиги мазкур хабарлар билан тўлди.
Ҳақиқатдан ҳам суратдаги шахснинг Фурқат туман ҳокимининг ҳайдовчиси Илҳом Аҳмаджонов экани, шунингдек, у Ўзбекистон халқ устаси Муҳаммадали Юнусовнинг шогирдларидан бири бўлганлиги маълум бўлди. Ҳоким ҳайдовчиси “Уста Юсуфжон наққош” оилавий корхонасида шогирд сифатида фаолият олиб борган.
“Илҳом Аҳмаджонов аввалдан ўзида ўймакорликка, дурадгорликка қизиқиш борлиги сабаб, туманга келгач “Уста Юсуфжон наққош” оилавий корхонасида миллий ёғоч ўймакорлиги санъати ўрганиш имконияти мавжудлигидан фойдаланиб, шогирд сифатида ҳунар сирларини ўргана бошлаган. Кечаги ташрифда ҳам корхонада доимий фаолият олиб бораётган усталардан ташқари Ҳунармандлар мактабининг қатор ўрганувчилари ҳам бўлишганини эътиборга олганда, Илҳом Аҳмаджоновнинг ҳам улар қаторида у ерда бўлиши табиий ҳолатдир”, - дейилади хабарда.
Давлат раҳбари билан мулоқот қилган Илҳомжон Сулаймонов, фаолияти давомида мактабда меҳнат фанидан ўқитувчи бўлгани, ўқувчиларга дурадгорлик ва ўймакорлик бўйича сабоқ берганини айтиб ўтган.
У ҳозирда тумандаги 21-мактабда маънавий-маърифий ишлар бўйича 0,75 ставкада директор ўринбосари лавозимида ишлаб келади. Узоқ йиллардан бери амалий ўймакорлик билан шуғулланган “замдиректор” “Уста Юсуфжон наққош” оилавий корхонасида тушдан кейин шогирдларига ҳунармандлик сирларини ўргатади.
