Қозоғистонда 2 ёшли бола 105 та магнит ютиб юборди
Ҳозирда боланинг аҳволи қониқарли экани айтилмоқда.
Қозоғистоннинг Олмаота шаҳрида шифокорлар 2 ёшли боланинг ошқозонидан 105 та магнит шарчасини олиб ташлашди.
Соғлиқни сақлаш бошқармаси маълумотига кўра, 20 февраль куни Олмаота шаҳридаги Болалар шошилинч тиббий ёрдам марказига 2 ёшли бола ёт жисм ютиб юбориш эҳтимоли билан олиб келинган.
Ота-онасининг сўзларига кўра, бола тахминан бир ҳафта олдин меҳмондорчиликда бўлиб, металл магнитларни ютиб юборган бўлиши мумкин. Уларнинг аниқ сони номаълум бўлган.
Шифокорлар рентген текширувида боланинг қорин соҳасида 6,2 × 2,2 см ўлчамдаги зич металл жисми борлигини аниқлашди. Бемор шошилинч равишда касалхонага ётқизилган. Мутахассислар аввал магнитларни эндоскопик йўл билан олиб ташлашга ҳаракат қилишди, аммо уларнинг бир-бирига зич ёпишиб қолганлиги сабабли буни амалга ошириб бўлмади.
Шифокорлар жарроҳлик амалиёти – лапаротомия ва гастротомия ўтказишга қарор қилишди. Операция давомида боланинг ошқозонидан 105 та магнит шарчаси чиқариб олинди.
Операциядан сўнг бола реанимация бўлимига, кейинчалик эса жарроҳлик бўлимига ўтказилди. Шифокорларнинг айтишича, ҳозирда боланинг аҳволи қониқарли.
