Шимолий Кореяда биринчи компьютер клуби очилди
“Рақамли марказ” да компьютер ва мониторлар йўқ.
Шимолий Корея етакчиси Ким Чен Ин яқинда мамлакатда очилган биринчи "компьютер клуби"ни шахсан бориб кўздан кечирди. Расмий очилиш маросими арафасида у клуб инфратузилмаси билан танишди.
Қизиғи шундаки, 300 кишига мўлжалланган бу клубда компьютерлар ва мониторлар мавжуд эмас. Расмий кадрларда бинонинг замонавий кўриниши, ёрқин ёритилган заллари, кўплаб бильярд столлари ва ўйин креслолари акс этган. Компьютер техникаси мавжуд бўлмагани эса халқаро кузатувчилар эътиборини тортган.
Расмий матбуот бу клубни "рақамли билимлар маркази" деб атаган бўлсада, унинг аниқ функциялари ва фойдаланиш тартиби бўйича тафсилотлар берилмаган. Бу ҳолат Шимолий Кореяда технологияга оид инфратузилмалар қанчалик ривожланганига оид саволларни яна бир бор кун тартибига олиб чиқди.
