Сурхондарё ҳокими калтакланган директорни кўргани борди
Беморга бош мия ёпиқ жароҳати, бош мия чайқалиши ташхиси қўйилган.
Аввалроқ Сурхондарё вилояти Сариосиё туманида 28-мактаб директори Умида Турсунова калтаклаб кетилгани ҳақида хабар берилганди. Вилоят ҳокими Улуғбек Қосимов тиббиёт бирлашмасига бориб, унинг ҳолидан хабар олди.
Маълумотларга кўра, беморга бош мия ёпиқ жароҳати, бош мия чайқалиши, бошнинг пешона тепа энса соҳаси кўплаб эзилиб йиртилган жароҳатлари, иккала кўз юқори ва пастки қовоқларга қонталашиш диагнози қўйилган.
У.Турсуновага Республика шошилинч тиббий ёрдам илмий маркази Сурхондарё филиали мутахассислари томонидан консультация қилиниб, зарур тиббий ёрдамлар кўрсатилмоқда. Айни вақтда беморнинг аҳволи барқарор. Уни РШТЁИМ вилоят филиалига кўчириш чораси кўрилмоқда.
Вилоят ҳокими У.Турсуновага шикаст етказган айбдорнинг қонунга мувофиқ жавобгарликка тортилишини ҳамда унинг тўлақонли даволанишини ўз назоратига олганлигини билдирди.
