Ijtimoiy tarmoqda Toshkent xalqaro aeroportining uchib kelish zalida bagaj aravachalari va katta hajmdagi yuklar bilan odamlar to‘planib turgan vaqtda ayol yo‘lovchilardan biri hushidan ketgani aks etgan video tarqaldi.
Rasmiy xabarga ko‘ra, yo‘lovchilarning to‘planib turishi aeroportda yuklarning kechikishi bilan bog‘liq emas. Istanbul – Toshkent yo‘nalishi bo‘yicha HY-272 reysi Toshkent vaqti bilan soat 19:04 da poytaxt aeroportiga qo‘ngan. Samolyotdan yuklarni tushirish 19:23 da boshlangan. Bagajlar o‘z vaqtida yo‘lovchilarga yetkazilgan. Yo‘lovchilarning to‘planib qolishi bagajlar olingach bojxona nazoratiga o‘tish joyida kuzatilgan.
Taʼkidlanishcha, bojxona qo‘mitasi xodimlari tomonidan fuqarolarga bir necha bor qonun hujjatlari bo‘yicha tushuntirishlar berilganiga qaramay, ko‘p miqdorda yuki bo‘lgan bir necha yo‘lovchilar tijorat maqsadida olib kelingan tovarlarni bojxona nazoratidan o‘tkazish va rasmiylashtirishdan bosh tortgan.
Uchib kelish zalida hushidan ketgan ayolga aeroport tibbiyot xodimlari tomonidan birinchi tibbiy yordam ko‘rsatilgan va ayolning hushdan ketishiga uning sog‘lig‘idagi muammolar sabab bo‘lgan.