Ijtimoiy tarmoqlarda Toshkent shahridan oqib o‘tuvchi Qoraqamish kollektoridagi suv oq rangda oqayotganligi bo‘yicha xabarlar tarqaldi. Holat yuzasidan Toshkent shahar Ekologiya boshqarmasi munosabat bildirdi.
Qayd etilishicha, Toshkent shahar Ekologiya boshqarmasi hamda Toshkent shahar Prokuraturasi hamkorligida olib borilgan o‘rganish natijalari bo‘yicha mazkur qonunbuzilish holatini sodir etgan fuqaroning shaxsiga aniqlik kiritilgan.
Qurilish materiali hisoblangan (suyuq shpaklyovka)ni qonunga xilof tarzda Qoraqamish kollektoriga o‘zboshimchalik bilan oqizganligi uchun davlat inspektori tomonidan MJtKning 91-moddasiga asosan maʼmuriy bayonnoma rasmiylashtirilib, BHMning 10 baravari (3,4 mln so‘m) miqdorida jarima belgilandi.
Shuningdek, ifloslantirilgan Qoraqamish kollektoridan ekologik laboratoriya uchun tahlil namunalar olingan, bugungi kunda mutaxassislar tomonidan tekshiruvlar o‘tkazilmoqda. Tekshiruv ishlarining yakuniy natijalari bo‘yicha tabiatga yetkazilgan zarar hisoblanib, qoplama to‘lovlari undiriladi.