Туркияда ИШИДга алоқадор 51 киши ушланди
Бу бўйича 21 та вилоятда операция ўтказилган.
Туркия махсус хизматлари 51 кишини “Исломий давлат” гуруҳига алоқадорликда гумон қилиб қўлга олди. Бу ҳақда Туркия Ички ишлар вазирлиги раҳбари Али Эрликая маълум қилди.
“21 вилоятда тўрт кун давомида ўтказилган амалиётлар доирасида ИШИД террорчилик ташкилоти билан алоқадорликда гумон қилиниб, 51 киши қўлга олинди”, — деб ёзди вазир Х ижтимоий тармоғида.
Ички ишлар вазирлиги раҳбарининг сўзларига кўра, қўлга олинганларнинг аксарияти Анқарада (ўн киши) бўлган. Тинтувлар давомида гуруҳ фаолиятига оид ҳужжатлар ва рақамли ахборот воситалари мусодара қилинди.
Эслатиб ўтамиз, январь ойида “Исломий давлат” гуруҳи Истанбулдаги черковга уюштирилган ва бир киши ҳалок бўлган ҳужум учун жавобгарликни ўз зиммасига олганди. «Анадолу» агентлиги маълумотларига кўра, 3 январь куни Туркия бўйлаб черков ва синагогаларга ҳужум уюштирганликда гумон қилинган 25 нафар гуруҳ аъзоси ҳибсга олинган.
