Visa va Mastercard xalqaro to‘lov tizimlari Ukrainadagi urush tufayli Rossiyaga qarshi joriy qilingan sanksiyalarni amalga oshirish maqsadida Rossiya moliya institutlarini xizmatdan uzishni boshladi.
Bu haqdagi xabarlar kompaniyalar veb-saytlarida paydo bo‘ldi.
Shunday qilib, Visa "tezkor choralar" ko‘rmoqda. Avvalroq Mastercard ham sanksiyalar tufayli Rossiyaning bir qancha moliyaviy institutlarini o‘z to‘lov tizimidan uzib qo‘ygani haqida maʼlum qilgan, biroq gap qaysi banklar haqida ketayotganiga aniqlik kiritmagan.
OAV xabarlariga ko‘ra, sanksiyaga uchragan Rossiya banklarining mijozlari endi Visa va Mastercard kartalari bilan xorijda va chora-tadbirlarni qo‘llab-quvvatlovchi mamlakatlarda ro‘yxatdan o‘tgan onlayn-do‘konlarda to‘lay olmaydi.
Biroq, allaqachon chiqarilgan Visa va Mastercard kartalari Rossiyada amal qilishda davom etadi, chunki ichki to‘lovlar 2014 yilda yaratilgan ichki Milliy to‘lov kartalari tizimi tomonidan amalga oshiriladi.
Eslatib o‘tamiz, avvalroq YEI Rossiya bilan to‘liq miqyosli iqtisodiy va moliyaviy urush olib borishini aytgandi.