Хитой раҳбарининг асари илк бор ўзбек тилида чоп этилди
Тошкентда Си Сзинпиннинг “Инсон ҳуқуқларини ҳурмат қилиш ва кафолатлаш тўғрисида” номли китоби тақдим этилди.
Тошкент шаҳрида Хитой Халқ Республикаси Раиси Си Сзинпиннинг ўзбек тилида илк маротаба нашр этилган “Инсон ҳуқуқларини ҳурмат қилиш ва кафолатлаш тўғрисида” номли китоби тақдимоти бўлиб ўтди. Тадбир Хитой Инсон ҳуқуқларини ўрганиш жамияти, ХХРнинг Адабиётларни хорижий тилларда нашр этиш ва тарқатиш бошқармаси, ХХРнинг Ўзбекистондаги элчихонаси ҳамда Инсон ҳуқуқлари бўйича Ўзбекистон Республикаси Миллий маркази ҳамкорлигида ташкил қилинди.
Тақдимотда Хитой Инсон ҳуқуқларини ўрганиш жамиятининг ижрочи вице-президенти Тсзян Тсзянго, Ўзбекистон Инсон ҳуқуқлари бўйича Миллий маркази директори Акмал Саидов, ХХРнинг Ўзбекистондаги Фавқулодда ва мухтор элчиси Ю Сзюн, шунингдек илмий доиралар, давлат идоралари, жамоат ташкилотлари, дипломатик корпус ва ОАВ вакиллари қатнашди.
Чиқишларда таъкидланишича, мазкур китоб Хитойнинг инсон ҳуқуқларини ҳимоя қилиш масаласидаги консептуал ёндашувларини ёритувчи муҳим манба ҳисобланади. Асарнинг ўзбек тилида нашр этилиши илмий-маърифий алмашинувни кенгайтириш, давлатлараро мулоқотни чуқурлаштириш ва гуманитар ҳамкорликни ривожлантиришда катта имкониятлар яратиши қайд этилди.
Тадбир якунида меҳмонлар ва иштирокчиларга ХХР Раиси Си Сзинпиннинг “Инсон ҳуқуқларини ҳурмат қилиш ва кафолатлаш тўғрисида” номли китобининг ўзбек тилидаги нашри топширилди.
