Хитойда қишки олимпия ўйинларига алоқадор шахсда коронавируснинг ўта юқумли варианти аниқланди
Шунга қарамай, 18 кундан сўнг мусобақалар бошланади.
Хитойда қишки олимпия ўйинлари бошланишига 18 кун қолганда илк бор коронавируснинг "Omicron" штамми аниқланди.
Хитойда чоп этиладиган "The Global Times" газетасининг хабарига кўра, Пекин яқинидаги Хайдян шаҳрида қишки олимпия ўйинларига алоқадор шахсда коронавируснинг ўта юқувчан варианти аниқланган. Шанхай ва Гуандун провинцияларида ҳам кеча 15 январь куни "Omicron" билан касалланиш ҳолатлари қайд этилган. Соғлиқни сақлаш комиссияси ушбу ҳудудларда "Omicron"нинг кенг тарқалиши эҳтимоли юқорилиги ҳақида огоҳлантирган.
Халқаро олимпия қўмитаси Пекин—2022 иштирокчиларини "Omicron" бутун дунё бўйлаб тарқалаётгани сабабли “ўз вақтида эҳтиёт бўлиш” ҳақида огоҳлантирди ва барчадан сафар олдидан беш кун давомида “оломон жойлардан сақланишни” сўрамоқда.
COVID-19 га қарши тўлиқ эмланганларнинг барчаси Хитойга келгандан сўнг 21 кун давомида карантинда бўлишлар шарт бўлмайди. Фақат ҳар куни тестдан ўтказилиб турилади, дейилади The Global Times хабарида.
