Yana bir o‘zbek kinosi “Eng yaxshi film” deb topildi

23-26–aprel kunlari Qirg‘izistonda o‘tgan XII Xalqaro qisqa metrajli filmlar festivalida yosh rejissyorlar Adhamjon Abdurahmonov va Sherzod Nazarov tomonidan ishlangan “Shamol odamlari” qisqa metrajli filmi tanlovning “Eng yaxshi film” nominatsiyasida g‘olib bo‘ldi.

 

 

Bugun Renessans kino uyida Kinematografiya agentligi rahbariyati film ijodkorlarini tabriklab, ularning har biriga pul mukofoti berilishini taʼkidladi. Agentlik jamoasi yosh rejissyorlarni erishgan g‘alabasi bilan tabriklab, kelgusidagi faoliyatida omad tiladi.

 

 

 

— Yurtimizda so‘nggi yillarda yosh kinoijodkorlarga bo‘lgan eʼtibor har qachongidanda ortgan. Muhtaram Prezidentimizning ularga berayotgan imkoniyatlari ham mana o‘zini oqlay boshladi. Biz bugun mazkur film ijodkorlarini tabriklagan holda, kelgusi ishlarida ham zafarlar tilaymiz. O‘ylaymizki, yoshlarimiz tomonidan xalqaro darajadagi filmlar hali ko‘p yaratiladi, — dedi Firdavs Abduxoliqov.

 

Maʼlumot uchun, Adhamjon Abdurahmonov O‘zbekiston davlat sanʼat va madaniyat instituti, Sherzod Nazarov esa Butunrossiya davlat kinematografiya instituti Toshkent filiali talabasi.

 

Filmda Xorazm viloyati va Qoraqalpog‘iston Respublikasidan tashqari, O‘zbekistonning barcha 11 ta viloyatini velosipedda kezgan Fayzullo, Mardon va Hamroqul ismli keksa do‘stlarning sayohati tasvirlangan. Pandemiya sabab ularning bu 2 manzilga borish orzusi amalga oshmay qoladi. Oradan ikki yil o‘tib, 73, 79, 83 yoshdagi uch do‘st yana safarga chiqish imkoniga ega bo‘lishadi. Kinokartinada maqsad sari ortga qaytmaslik ilgari suriladi.

 

 

“Shamol odamlari” filmining ssenariy muallifi va rejissyorlari Sherzod Nazarov va Adhamjon Abdurahmon, operator Javohir Turg‘unov, prodyuser Furqat Usmonov, maslahatchi Yusuf Roziqov.