Йўл чизиғини босганлик учун жарима тартиби ўзгарди: қайси жойларда баённома расмийлаштирилмайди?
Шунингдек, хавфсизлик камарини тақмаслик ҳолатлари махсус автоматлаштирилган қурилмалар орқали ҳам аниқланиши мумкин.
Вазирлар Маҳкамасининг 2026 йил 29 октябрдаги 596-сон қарорига мувофиқ, 1 ноябрдан чорраҳалар ва қайрилиб олиш жойлари яқинида йўл чизиқларини босиб ҳаракатланган ҳайдовчиларга нисбатан маъмурий баённома расмийлаштириш тартиби ўзгаради.
Унга кўра, чорраҳагача бўлган 50 метр ва қайрилиб олиш жойларигача бўлган 20 метр масофада 1.1 ва 1.3 йўл ётиқ чизиқларини босиб ҳаракатланганлик учун Йўл-патруль хизмати инспекторлари томонидан маъмурий баённома расмийлаштирилмайди.
Шунингдек, қарор билан ҳайдовчиларнинг транспорт воситасини бошқариш ва йўловчиларни ташиш вақтида хавфсизлик камаридан фойдаланиш қоидаларига риоя этмаслик ҳолатларини махсус автоматлаштирилган фото ва видео қайд этиш қурилмалари орқали аниқлашга рухсат берилди.
Яъни эндиликда хавфсизлик камарини тақмаслик ҳолатлари нафақат ЙПХ ходимлари, балки техник талабларга жавоб берадиган ва маълумотларни “Маъмурий амалиёт” модулига автоматик равишда узатиш имкониятига эга махсус қурилмалар орқали ҳам қайд этилиши мумкин.
Қарорда стационар, яъни қўзғалмас радарлар жойлашган ҳудудларда йўл белгиларини ўрнатиш талаби ҳам белгиланган. Унга кўра, радар жойлашган ҳудудда ва ундан 250 метрдан кам бўлмаган, 500 метрдан кўп бўлмаган масофада 5.43 йўл белгиси ўрнатилиши мажбурий ҳисобланади.
