Yaponiyaning Shidzuoka prefekturasi okrug sudi 89 yoshli Ivao Xakamatani aybsiz deb topdi va unga 217 million iyen (taxminan 1,44 million dollar) miqdorida tovon to‘lash qarorini chiqardi. U 1966-yilda o‘z rahbari va uning oilasini o‘ldirishda ayblanib, qamoqqa olingan va o‘lim jazosiga hukm qilingan edi.
Kyodo agentligining xabariga ko‘ra, sud bu qarorni Xakamataning 47 yil davomida nohaq qamoqda o‘tirgani va tergov jarayonida qiynoqlar ostida aybini bo‘yniga olishga majburlangani sababli chiqargan.
2014-yilda uning DNKsi jinoyat joyida topilgan qon izlari bilan mos kelmasligi isbotlanganidan so‘ng, Xakamata qamoqdan ozod etilgan. 2024-yil sentabr oyida Shidzuoka okrug sudi uni to‘liq oqlab, tergov davomida uchta asosiy dalil soxtalashtirilganini e’lon qildi. Oradan bir oy o‘tib, prokuratura bu qaror ustidan shikoyat qilmasligini bildirdi.
Shu tariqa, Xakamata Yaponiya tarixida eng uzoq vaqt o‘lim jazosini kutgan va aybsiz deb topilgan mahkum sifatida tarixga kirdi.