Yevroittifoq Rossiyaning "Rosselxozbank" bankidan sanksiyalarni olib tashlash masalasini ko‘rib chiqmoqda. Bu haqda Yevropa Kengashining rasmiy vakili Peter Stano maʼlum qildi.
"Biz Rossiyaning "Rosselxozbank"ning oziq-ovqat va qishloq xo‘jaligidagi ahamiyati, shuningdek, uning SWIFT tizimidan uzilgandan keyingi qiyinchiliklar bo‘yicha daʼvolarini inobatga oldik", — degan u.
Stanoning qo‘shimcha qilishicha, bank orqali to‘lovlarni amalga oshirish mumkin, ammo tranzaksiyalar oldingiga nisbatan qimmat va sekin ketmoqda. Yevrokengash rasmiy vakili ko‘plab rus banklari SWIFT tizimidan uzilmaganini, oziq-ovqat va o‘g‘it bo‘yicha kelishuvlar sanksiyalardan tashqarida ekanini taʼkidlagan.
Noyabr o‘rtasida Rossiya TIV BMT bilan "Rosselxozbank"ni SWIFT tizimiga qaytarish masalasini ko‘rib chiqayotganini maʼlum qilgandi. Financial Times maʼlumotlariga ko‘ra, AQSH ham bu masalada yon berishga tayyor.