Халқаро қидирув ва Грузиядаги ҳибс: ўзбекистонлик аёл Қозоғистонга экстрадиция қилинди
У уюшган жиноий гуруҳда иштирок этиш ва қўшмачиликда гумонланмоқда.
Трансмиллий уюшган жиноятчилик гуруҳида иштирок этиш ва қўшмачиликда гумонланган Ўзбекистон фуқароси Грузиядан Қозоғистонга экстрадиция қилинди. Бу ҳақда Қозоғистон Бош прокуратурасига таяниб, KazTAG хабар берди.
Маълум қилинишича, аёл Қозоғистон Ички ишлар вазирлиги, Бош прокуратура ва Интерпол ходимлари томонидан Қозоғистоннинг Грузиядаги элчихонаси кўмагида мамлакатга қайтарилган.
Тергов маълумотларига кўра, у уюшган жиноий гуруҳнинг бошқа аъзолари билан биргаликда фоҳишалик ва бошқа жинсий хизматлар кўрсатувчи шахслардан Kyzdar.net сайтида аккаунтларини тўлдириш учун маблағ қабул қилган. Бу пуллар уларнинг жинсий хизматларини реклама қилиш ва тарғиб этишга йўналтирилган.
Гуруҳ аъзолари келиб тушган маблағлардан комиссия ушлаб қолиб, қолган қисмини сайт ташкилотчиларига ўтказган. Шу тариқа ноқонуний қўшмачилик схемаси фаолияти таъминланган.
Қозоғистон Бош прокуратураси маълумотига кўра, гуруҳнинг айрим аъзолари аллақачон турли муддатларга озодликдан маҳрум қилинган. Бошқалари, жумладан, мазкур аёл ҳам жиноий жавобгарликдан қочиб, халқаро қидирувга берилган.
Гумонланувчи жорий йил июль ойида Грузияда қўлга олинган ва Қозоғистон Бош прокуратураси сўровига биноан экстрадиция қилинган. Ҳозирда у судгача бўлган тергов доирасида ҳибсда сақланмоқда.
Қозоғистон қонунчилигига кўра, айбланаётган жиноятлари учун мол-мулкни мусодара қилиш билан бирга 10 йилгача озодликдан маҳрум этиш жазоси назарда тутилган.
