Украина бўйича музокараларда янги босқич: Стубб учрашув муддатини маълум қилди
Финляндия президенти АҚШ, Россия, Украина ва Европа вакиллари иштирокидаги учрашув бир-икки ҳафта ичида ўтказилиши мумкинлигини айтди.
Финляндия президенти Александр Стубб АҚШ, Россия, Украина ва Европа вакиллари иштирокида техник даражадаги янги учрашув бир ёки икки ҳафта ичида бўлиб ўтиши мумкинлигини маълум қилди. Унинг фикрича, Европа вакилларининг музокараларда иштирок этиши реал имкониятга эга.
Стубб бу ҳақда СNN телеканалига берган интервьюсида айтган. Унинг сўзларига кўра, тўрт томон вакиллари иштирокидаги учрашув музокаралар жараёнида ижобий силжишга хизмат қилиши мумкин.
Финляндия раҳбари, шунингдек, АҚШ президентининг махсус элчилари Стив Уиткофф ва Жаред Кушнернинг Москвага ташрифи натижаларини кутиш зарурлигини таъкидлади. Унинг фикрича, Европа вакилларининг музокаралар столига қайтиши эҳтимоли бор.
Стубб Европанинг музокараларга қўшилиши бўйича якуний қарор Россия ва Украина президентлари Владимир Путин ҳамда Владимир Зеленскийга боғлиқлигини ҳам қайд этган.
Айни пайтда Россия томони Европа давлатларининг музокараларга қўшилишига эҳтиёткорона муносабат билдирмоқда. Россия ташқи ишлар вазири ўринбосари Сергей Рябков Европа мамлакатларининг уч томонлама музокараларга қўшилиши жараённи ортга суриши ва мавжуд саъй-ҳаракатларга путур етказиши мумкинлигини айтган.
