2021 йилда ўта қашшоқлар сони дунё миқёсида 23-35 миллион кишига етиши кутилмоқда
Пандемия аллақачон ўта қашшоқликда яшовчилар сонини 115 миллионга кўпайтирди. Бу йил уларнинг сони кўпроқ бўлади. Камбағал одамлар сонининг бу қадар кўпайиши бир неча ўн йилликлардан бери кузатилмаётган эди. Шу билан бирга, ҳамма давлатлар ҳам қашшоқ аҳолига ёрдам қўлини чўзолмайдилар.
БМТ мутахассиси келгусида юзага келиши мумкин бўлган мана шундай ҳолатларнинг олдини олиш учун Глобал ижтимоий ҳимоя фонди ташкил этишни таклиф этмоқда.
БМТнинг ўта қашшоқлик ва инсон ҳуқуқлари бўйича махсус маърузачиси Оливе де Шуттер «Бугунги ижтимоий-иқтисодий инқироз ижтимоий таъминот ҳуқуқини амалга ошириш долзарб масала эканини исботлади. Бироқ, кам даромадли мамлакатларда камбағалларнинг ҳуқуқларини таъминлаш учун этарли фискал майдон мавжуд эмас ... », - дейди.
Оливе де Шуттернинг таъкидлашича, ҳозирги пандемия сингари шароитларда қашшоқ мамлакатларда ижтимоий ҳимоя даражасини сақлаб қолиш учун глобал фондни яратиш зарур.
CОVID-19 пандемияси дунёдаги энг қашшоқ одамларга оғир юкни юкламоқда, улар ёрдамисиз омон қололмайдилар.
Коронавирус пандемияси бошланишидан олдин ҳам, дунё аҳолисининг аксарияти - 55 фоизи ёки 4 миллиард одам ижтимоий ҳимояга эга эмас эди. Болалар нафақаси дунёдаги ҳар учинчи боладан биттасигагина тўланади. Мутахассиснинг таъкидлашича, илгари ижтимоий ҳимояга жуда кам маблағ сарфланган ва шу сабабли CОVID-19 пандемияси кўплаб мамлакатларни эсанкиратиб қўйди. Масалан, Европа ва Марказий Осиё мамлакатларида, турли хил ижтимоий нафақалар билан таъминланиш даражаси энг юқори дея ҳисобланган. Шунга қарамай аниқ бўлдики, аҳолининг атиги 42,5 фоизигина қамраб олинган.
Пандемия пайтида кўплаб давлатлар ўз аҳолисини моддий жиҳатдан қўллаб-қувватлади. Аммо бутун дунё бўйлаб жами 2,7 миллиард одам инқирозга қарши туришда ёрдам олмади.
БМТнинг ўта қашшоқлик ва инсон ҳуқуқлари бўйича махсус маърузачиси Оливе де Шуттернинг БМТнинг Инсон ҳуқуқлари бўйича Кенгашига тақдим этган ҳисоботида, «Жаҳон банкининг маълумотларига кўра, фақатгина CОVID-19 пандемияси туфайли юзага келган фавқулодда вазият биргина 2020 йилда тиланчилар сонининг 88-115 миллион кишига кўпайишига олиб келди ва 2021 йилда уларнинг сони янада ошиши ва 23-35 миллион кишига етиши кутилмоқда», - дейилади.
Мутахассис пандемия оқибатларидан сабоқ олиш ва жаҳон миқёсида ижтимоий ёрдам тизимини кучайтириш зарур деб ҳисоблайди.
