Европа Иттифоқи Белоруссия фуқароларига виза беришни тўхтатмоқчи
Европа Иттифоқи Европага ноқонуний иммиграция даражаси ошаётгани туфайли Белоруссия фуқароларига виза беришни тўхтатиш эҳтимолини кўриб чиқмоқда.
Бу ҳақда ички ишлар бўйича Еврокомиссар Ильва Йохансон маълум қилди.
Унинг сўзларига кўра, Европа ноқонуний миграция сиёсий мақсадларни амалга ошириш воситасига айланмаслиги учун виза режимини тўхтатади.
Ўз навбатида, Европага Белоруссия орқали ўтишга уринаётган муҳожирлар оқимидан жабрланаётган Литва Минскка қарши янги санкциялар эълон қилишни сўрамоқда.
Олдинги санкциялар пакети 23 май куни Ryanair самолётининг Минскда мажбуран қўндирилгани билан боғлиқ эди.
Брюссель ва Минскнинг алоқалари ёмонлашиши фонида Литвага ноқонуний мигрантлар оқими кучайди. Шу йилнинг бошидан бери Литва ҳукумати 1600 дан ортиқ одамни қўлга олди, бу бутун 2020 йилдан йигирма мартага кўп. Муҳожирларнинг аксарияти Яқин Шарқ ва Африка давлатларидан келган.
Олдинроқ хабар қилганимиздек, Литва Белоруссияни юзлаб мигрантларни мамлакат ҳудудига юборишда айбламоқда.
Белоруссия қўшнилари билан чегарани ёпмоқчи эмас. Белоруссия президенти “Ҳеч кимни ҳеч қачон ушлаб қолмаймиз, ахир улар бизга келишмаяпти-ку. Улар иссиқ ва қулай Европага талпинаяпти”, - деган.
