Россияга четдан бориб ишлаш тартиби ўзгарди
Россияда 2021 йил 1 августдан муҳожирлар учун имтиҳон янги топшириқлар бўйича ўтказилади.
Назорат материаллари Педагогик талаблар федерал институти томонидан ишлаб чиқилган. Бу ҳақда “ТАСС” хабар берди.
Маълум қилинишича, чет тили сифатида рус тилидан, Россия тарихи, яшаш ва ишлаш ниятида бўлган чет элликлар учун мамлакат қонунчилигининг асослари бўйича 1 августдан янги топшириқлар асосида имтиҳон ўтказилади, деб хабар берган Рособрнадзор матбуот хизмати.
Имтиҳон чет элликлар ва фуқаролиги йўқ шахслар учун уч даражада ўтказилади: ишлаш учун рухсатнома ёки патент, вақтинча яшаш рухсатномаси (РВП) ва яшаш гувоҳномасини (ВНЖ) олиш учун.
Рус тилидан имтиҳон оғзаки ва ёзма шаклда, Россия тарихи ва қонунчилиги асосларидан эса тест, жумладан, компьютер технологияларидан фойдаланган ҳолда олинади.
ФИПИ сайтида тестларнинг намойиш учун белгиланган вариантлари билан танишиш мумкин.
Россия ҳукумати Рособрнадзорга муҳожирлар учун имтиҳондан ўтишни мажбурийлиги талабларининг бажарилишини давлат номидан назорат қилиш вазифасини юклаган.
