Таиландга 15 кун визасиз кириш: Ўзбекистон ҳам рўйхатда
Мамлакат расмийлари виза расмийлаштиришдаги кечикишларни бартараф этиш ва сайёҳлар оқимини ошириш учун учта давлат фуқароларига визасиз режим таклиф қилмоқда.
Таиланд расмийлари Ўзбекистон, Колумбия ва Мексика фуқаролари учун 15 кунлик визасиз режим жорий этишни таклиф қилмоқда. Ташаббус виза расмийлаштиришдаги кечикишларни бартараф этиш ва узоқ масофадан келадиган сайёҳлар оқимини оширишга қаратилган.
The Nation нашрининг Таиланд Туризм ва спорт вазирлигига таяниб хабар беришича, тегишли таклиф 9 ноябрь куни Виза сиёсати қўмитаси йиғилишида кўриб чиқилиши режалаштирилган.
Таиланд Туризм ва спорт вазири Мексика ва Лотин Америкасининг бошқа мамлакатларидан келадиган сайёҳлар виза расмийлаштиришдаги кечикишларга дуч келаётганини тасдиқлаган.
Нашр маълумотларига кўра, Эмиратес авиакомпанияси Мексикадан учадиган айрим рейсларда йўловчилар Таиланд визаларини ўз вақтида ололмаётгани сабабли муаммолар юзага келганини билдирган. Ҳар бир рейсда 20–30 нафаргача йўловчи виза билан боғлиқ муаммолар туфайли сафарга чиқа олмаган.
Ўзбекистонлик сайёҳлар учун ҳам тартиб соддалашиши мумкин
Таиланд расмийлари Ўзбекистон фуқаролари ҳам электрон виза олиш жараёнида қийинчиликларга дуч келганини қайд этган. Хусусан, виза расмийлаштириш тартиби мураккаблиги сабабли айрим маҳаллий сайёҳлик агентликлари Таиландга мўлжалланган саёҳат пакетларини бекор қилиб, Ветнам каби бошқа йўналишларни таклиф қилишга мажбур бўлган.
Таиланд томони таклифни амалга оширишдан олдин унинг хавфсизлик ва иқтисодий оқибатларини ҳам баҳолайди.
