Мулла Абдул Ғани Бародар: у аслида ким бўлган?

Келиб чиқиши пуштунлардан бўлган Бародар Афғон урушида совет қўшинларига қарши кураш олиб борган. 1994 йилда Муҳаммад Умарга “Толибон” ҳаракатини ташкил этишга ёрдам берган. Шунингдек, у Абу Ҳафс Нажда номи билан машҳур бўлиб, ҳарбий ўқув лагерлари, етакчилар ва чет элликларга қарши ҳужумларга бош-қош бўлган.

1996-2001 йилларда у ҳаракатнинг турли лавозимларида фаолият олиб борган. Нимроз, Ҳирот вилоятлари бошлиғи, Шарқий Афғонистон ҳарбий округи командири бўлган. АҚШ давлат департаменти уни Кобул ҳарбий корпуси қўмондони, ИНТЕРПОЛ Мудофа вазири ўринбосари, деб ҳисоблайди. 2010 йил 8 февралда Покистон разведкаси томонидан ҳибсга олинган Бародар 2013 йил 21 сентябрда Афғонистон ҳукумати сўровига асосан муддатидан аввал Покистон қамоқхонасидан озод этилган.

2021 йил 15 август куни “Толибон” ҳаракати босимидан сўнг Ашраф Ғани истеъфога чиқди. Афғонистон ҳукумати “Толибон” қўлига ўтди. Муваққат ҳукумат тузилиб, унга собиқ Ички ишлар вазири Али Аҳмад Жалолий раҳбар этиб тайинланди. Маълумаотларга қараганда, бугун Кобулда Афғонистон ҳукумати ҳокимиятни “Толибон” ҳаракатига топшириш жараёни кетмоқда.

Эслатиб ўтамиз, Ашраф Ғани Афғонистондан чиқиб кетиб, Тожикистондан бошпана топган.

Аввалроқ Афғонистоннинг 19 та вилояти Толибонлар қўлига ўтгани ҳамда Ашраф Ғани ҳокимиятдан воз кечгани ҳақида хабар берилганди.