Кўҳна қитъанинг энг кучли бешта чемпионати: илк натижа ва хулосалар
Шу йилнинг августида Европанинг энг кучли бешта чемпионатида янги футбол мавсуми бошланди. Хусусан, 13 августдан Англия Премьер Лигаси беллашувларига старт берилди. Турнирнинг дастлабки баҳслари бир қатор кутилган ва кутилмаган натижаларга бой бўлди.
«Тоттенхем» ва «Манчестер Cити» клублари ўртасидаги баҳсни кўплаб футбол ишқибозлари томоша қилгани шубҳасиз. Мавсум олдидан Манчестер клубида бир қатор ўзгаришларни амалга оширган Хосеп Гвардиола сафарда лондонликларга имкониятни бой бериб қўйди. «Тоттенхем»га ғалаба келтирган голга кореялик Сон Хин Мин муаллифлик қилди. Ушбу турда энг сермаҳсул баҳс «Манчестер Юнайтед» ва «Лидс» ўртасида бўлби ўтди.
Манчестер шаҳрида ўтган баҳсда «Қизил иблислар» 5:1 ҳисобида ғалабага эришди ва биринчи турдаёқ чемпионат пешқадамига айланди. Ушбу баҳсда Пол Погбанинг ҳаракатларини алоҳида эътироф этиш лозим. Франциялик футболчи баҳсда тўртда голга ассистентлик қилди. Бруно Фернандеш эса учта гол киритиб, турнир тўп урарига айланди. Биринчи турда кутилмаганда «Арсенал» «Брентфорд»га имкониятни бой бериб қўйди. Ўтган йили бир қатор йўқотишлар сабаб мавсумни муваффақиятсиз ўтказган «Ливерпул» клуби «Норвич»ни 3:0 ҳисобида мағлуб этди. Голларга Муҳаммад Салоҳ, Диогу Жота, Фирмино муаллифлик қилди. Ўтган мавсум Европа чемпионлиги ва мавсум бошида Европа супер кубогини қўлга киритган «Челси» ҳам «Кристал Пелас»ни худди шу ҳисобда мағлубиятга учратди.
Турнинг энг қизиқарли баҳсларидан бири «Уотфорд» – «Астон Вилла» жамоалари иштирокида бўлди. Муросасиз кечган тўқнашувда «Уотфорд» 3:2 ҳисобда ғалаба қозонди ва ҳисобига уч очко ёзиб қўйди. Голларга бой баҳслардан бири «Нюкасл» ва «Вест Хем» клублари иштирокида бўлди. Ўйинда ҳисобни биринчи бўлиб «Нюкасл» футболчилари очган бўлишига қарамай якунда очкони «Вест Хем» қўлга киритди. «Листер» ҳамда «Вулверхемптон» клублари иштирокидаги ўйиннинг 41-дақиқасида Жейми Варди томонидан урилган гол «Листер»га ғалаба келтирди.
Шунингдек, ушбу турда «Бернли» «Брайтон»ни 1:2 ҳисобида мағлуб этган бўлса, «Эвертон» ўз уйида «Саутгемптон»ни 3:1 ҳисобида енгди. Англия чемпионатининг биринчи туридан кейин «Манчестер Юнайтед» биринчи ўринни эгаллаб турган бўлса, кейинги ўринларни «Ливерпул» ва «Челси» жамоалари банд этган. Охирги ўринларни ушбу клубларга йирик ҳисобда мағлуб бўлган «Лидс», «Кристал Пелас», «Норвич» эгаллаб турибди. Тўп урарлар руйхатидан биринчи ўрин «Лидс»га учта тўпга киритган «Манчестер Юнайтед» аъзоси Бруно Фернандеш насиб қилди. Кейинги ўринда «Вестҳем» футболчиси Соучек бормоқда. Иккинчи тур ўйинлари 21-22-23 август кунлари бўлиб ўтади.
Ла Лига
13 август куни Испания чемпионатининг ҳам янги мавсумига старт берилди. Мавсум олдидан бир қатор клубларда кутилмаган трансферлар амалга оширилди. Чемпионатнинг дастлабки турида бешта ўйинда дуранг натижа қайд этилди. Ла Лигани «Валенция» ва «Хетафе» клублари иштирокидаги баҳс очиб берди. Бу ўйинда валенцияликлар кичик ҳисобда ғалабага эришди. Учрашувда ягона голга Карлос Солер муаллифлик қилди.
Мессисиз қолган «Барселона» 4:2 ҳисобида «Реал Соседат»дан устун келди. Учрашувда Мартин Брейтуэйт дубл қайд этди. Биринчи турда етакчисини сотиб юборган Мадриднинг «Реал» клуби ҳам ишончли ғалабага эришди. Мадридликлар «Алавес» клубини 1:4 ҳисобида мағлуб этди. Мадриднинг иккинчи жамоаси «Атлетико» эса «Селта»дан бир тўп эвазига устун келди. Чемпионатнинг яна бир энг кучли жамоаларидан бири «Севиля» ўз майдонида «Раё Валекана»дан 3:0 ҳисобида устун келди. Қолган барча учрашувларда дурранг натижа қайд этилди.
Биринчи турдан кейин «Реал» турнир жадвалида биринчи ўринни эгаллаб турибди. Кейинги поғоналардан «Севиля» ва «Барселона» клублари жой олган. Охирги ўринларда «Раё Валекано», «Алавес» ва «Реал Соседат» жамоалари бормоқда.Тўп урарлар руйхатини эса «Барселона» ҳужумчиси Мартин Брейтуэйт бошқариб бормоқда. Испания чемпионатининг кейинги тур ўйинлари 21-22-23 август кунлари бўлиб ўтади.
Лига-1
Франция чемпионатида айни кунларда учинчи тур ўйинлари бўлиб ўтмоқда. Кеча ушбу турнинг дастлабки учрашувида «ПСЖ» «Брест» клубини 4:2 ҳисобида мағлуб этди. Парижликлар иккинчи турда «Страсбург»ни ҳам айнан шу ҳисобда мағлуб этганди. Шунингдек, ушбу турнинг энг қизиқарли ва голларга бой бўлган учрашуви «Реймс» ва «Монпеле» клублари ўртасида бўлиб ўтди. Муросасиз ўтган баҳс 3:3 натижа билан якунланди.
Бундан ташқари «Ланс»-«Цент-Этен» ва «Марсел» – «Бордо» учрашувлари ҳам жанговор дуранг билан якунланди. Ушбу турда энг йирик ҳисоб «Лил» ва «Нитса» жамоалари ўртасидаги баҳсда қайд этилди. Унда 4:0 ҳисобида «Нитса» жамаоси ғалаба қозонди. «Анже» – «Лион» ўртасидаги ўйинда ҳам йирик ҳисоб қайд этилди. Унда «Анже» клуби учта тўп ҳисобида рақибини мағлуб этди. «Нант» – «Метс», «Клермон» – «Труа» жамоалари иштирокидаги беллашувларда 2:0 ҳисоби қайд этилди. Унда «Нант» ва «Клермон» жамоалари рақибларидан устун эканлигини исботлади. «Брест» – «Рен» жамоалари бир очкодан олган бўлса, «Манако» «Лорян» устидан кичик ҳисобда устун келди.
Франция чемпионати иккинчи тур натижаларига кўра «ПСЖ» биринчи ўриндан жой олган бўлса, «Анже» ва «Клермон» клублари кейинги ўринларни эгаллаб турибди. Жадвалнинг сўнгги ўринларида «Страсбург», «Труа», «Лил» бормоқда. Тўп урарлар руйхатини учтадан тўп киритган «Марсел» ҳужумчиси Димитрий Пает ва «Клермон» ҳужумчиси Муҳаммад Баё эгаллаб турибди. Айни кунларда Франция чемпионатида учинчи тур ўйинлари бўлиб ўтмоқда.
Бундеслига
Англия ва Испания чемпионатлари каби 13 августдан старт олган Германия Бундес лигасида ҳам биринчи тур ўйинлари ўз ниҳоясига етди. Турнинг дастлабки учрашувида «Боруссия М» ҳамда «Бавария» жамоалари тўқнаш келди. Учрашувда жамоалар 1:1 ҳисобида дуранг натижага имзо чекишди. Бундан ташқари «Унион» – «Баер», «Армения» – «Фрайбург» учрашувларида ҳам дуранг натижа қайд этилди.
Турда бир қатор йирик ҳисоблар ҳам кузатилди. Хусусан, «Штутгарт» «Гройтер Фюрт»ни 5:1 ҳисобида мағлуб этган бўлса, «Аугсбург» – «Хоффенхайм» ўртасида бўлган беллашувда 0:4 ҳисоби қайд этилди. Шунингдек, «Боруссия Д» ўз уйида «А. Франкфурт»ни мағлуб этди. Дастлабки турда «Майнс» – «РБ Лейбсиг», «Волфсбург» – «Бохум» клублари учрашувида кичик ҳисобда «Майнс» ва «Волфсбург» клублари рақибларидан устун келди. Биринчи турнинг энг сўнгги баҳси «Кёлн» ва «Герта» жамоалари ўртасида ўтказилди.
Унда «Кёлн» 3:1 ҳисобида ғалаба қозонди. Германия чемпионати биринчи туридан кейин «Хоффенхайм» биринчиликда бораётган бўлса, кейинги ўринларни «Боруссия Д» ва «РБ Лейпсиг» клублари эгаллаб турибди. Турнир жадвалинининг сўнгги поғоналаридан «Аугсбург», «Гройтер Фюрт» ва «А. Франкфурт» жамоалари бормоқда.
Германия чемпионати тўпурарлари руйхатининг бошида Эрлинг Холанд, Кайнс, Кемпф, Сосаблай каби футболчилар турибди. Германия чемпионати 2-тур ўйинлари 21-22 август кунлари бўлиб ўтади. Кучли бешта чемпионатлар қаторига кирадиган Италия чемпионатининг биринчи тур ўйинлари ҳам 21-22 август кунлари ўтказилади.
Жамшидбек Амиров
