Аҳмад Масъуд: “Толибон”билан курашга тайёрман”
Панжшер вилоятидаги “Толибон” га қарши кучлар қўмондони Аҳмад Масъуд толибларга таслим бўлишдан бош тортди.
Масъуднинг сўзларига кўра, вилоят аҳолиси жангариларга қарши туришга қарор қилган. “Улар Панжшер устидан назорат ўрнатмоқчи бўлса, биз қаршилик кўрсатишга тайёрмиз. Биз СССРга қарши курашганмиз, толибларга ҳам қарши кураша оламиз”, деган қўмондон.
Шунингдек, у “Толибон” Афғонистонда хавфсизлик ва тинчлик шартларини бажарган тақдирда, отасининг ўлимини кечиришини айтган (Масъуднинг отаси машҳур дала қўмондони Аҳмадшоҳ Масъуд 2001 йил 9 сентябрда ўлдирилган).
Шу билан бирга, Масъуд толиблар музокаралардан бош тортганини маълум қилган. Қўмондоннинг фикрича, ҳаракат агар одамларни куч билан ушлаб туришда давом этса, унинг ҳокимияти узоққа чўзилмайди.
22 август куни “Толибон” Панжшерга таслим бўлиш учун 4 соат вақт берган. Шунингдек, вилоятга кўшимча кучларни жўнатиш бошланган. Бундан аввал бир неча олий мартабали афғон раҳбарлари, жумладан, Миллий ярашув кенгаши раҳбари Абдулла Абдулла ва собиқ президент Ҳамид Карзай Панжшерга музокаралар ўтказиш учун келган. Лекин музокаралар натижа бермаган.
Эслатиб ўтамиз, 21 август куни Кобулда янги ҳукумат тузиш масаласида музокаралар бошланган эди.
