ЖССТ: "Афғонистонга 500 тоннага яқин тиббий буюмларни етказиб бериш имконияти бўлмаяпти"

 

Жаҳон соғлиқни сақлаш ташкилоти Кобул аэропортидаги чекловлар туфайли Афғонистонга 500 тоннага яқин тиббий буюмларни етказиб бериш имконияти бўлмаётганини  маълум қилди, дея хабар беради "Аl-Jazira" телеканали.

 

"Улар юкни қабул қилишга тайёр, биз эса шу ҳафта ичида уни Афғонистонга жўнатмоқчи эдик. Аммо аэропорт ҳозирда тижорат рейслари учун ёпиқлиги туфайли бунинг имкони бўлмаяпти", — дейди ташкилот вакили Инас Ҳамам.

 

ЖССТ одамларни эвакуация қилиш учун Афғонистонга учаётган бўш самолётларни Дубайда тўхташга ва афғонларга мўлжалланган юкларни олиб боришга чақирмоқда.

Ташкилот Афғонистонга болалар пневмониясини даволаш учун жарроҳлик асбоб -ускуналарини етказиб беришга ҳаракат қилмоқда.

Бундан аввал ЮНИСEФ ижрочи директори Ҳенриетта Фор Афғонистонда 10 миллионга яқин бола гуманитар ёрдамга муҳтожлигини айтган эди. 

 

Насиба Тўхтаева