Тошкентда янги метро поездлари ишга туширилди
Бугун, 6 сентябрь куни Тошкент метрополитенида ўтган ҳафтада келтирилган ва тақдим этилган янги метро поездлари пойтахт аҳли ва меҳмонларига хизмат қилишни бошлади.
Янги поездларининг созлаш ишлари якунлангач, энг кўп йўловчилар оқимига эга бўлган Чилонзор йўналишига учта ҳаракат таркиб ўз ишини бошлади. Бу ҳақда "O‘zbekiston temir yo‘llari" АЖнинг ахборот хизмати хабар бермоқда.
Қайд этилишича, қолган яна иккита метро поезди яқин орада ушбу йўналишда аҳоли хизматида ҳаракатланади. Маълум қилинишича, Чилонзор йўналишида эрталабки тиғиз вақтда соат 07:30 дан 9:00 гача поездлар орасидаги интервал 3 дақиқани ва кечқурунги тиғиз вақтда 16:30 дан 19:30 гача 4 дақиқани ташкил этилмоқда.
Аввалроқ Ўзбекистон Республикаси Мустақиллигининг 30 йиллиги арафасида, Тошкент метрополитени учун Россиядан 5 та метропоезд олиб келингани тўғрисида хабар берилганди.
