«Роналдунинг кетиши фожиа эмас» - Массимилиано Аллегри
Италиянинг «Yuventus» клуби бош мураббийи Массимилиано Аллегри «КриРо»нинг жамоадан кетгани ҳақида фикр билдирди.
“Роналду энди «Yuve»да ўйнашни истамади, шунинг учун у «MYu»га қайтди. Ҳаммаси кутилган эди. Унинг учун ўтган мавсум сўнгиси бўлишини биз билардик.
Майли, ҳаёт тўхтаб қолмайди. Роналдунинг кетиши фожиа эмас. Жамоа янгидан янги совринлар учун курашишда давом этади. Криштианунинг келгуси фаолиятига эса омад тилайман”, - дейди туринликлар бош мураббийи.
Маълумот учун, 36 ёшли португалиялик суперюлдуз 2018 йил июль ойида «Yuventus» клуби билан шатнома имзолаганди.
Бир неча кун аввал у Италиядаги фаолиятини якунлаганини эълон қилди ва Англиянинг «Manchester Yunayted» жамоаси сафига қўшилди.
Роналду аввал ҳам 2003-2009 йиллар оралиғида «Manchester Yunayted»да ўйнаган. У «Қизил иблислар» билан уч марта Англия чемпионлигини, икки марта Англия Лига кубогини ва бир марта мамлакат кубогини қўлга киритган.
Эслатиб ўтамиз, аввалроқ Роналдунинг мажбурий карантинни ўтказаётгани ҳақида хабар бергандик.
Мақсаджон Обиджонов
