Тошкентдаги “Грант сомса”да ёнғин содир бўлди
Бугун ижтимоий тармоқларда "Юнусобод туманида жойлашган “Грант сомса” ошхонасида кучли ёнғин содир бўлгани айтилган видеолавҳа тарқалди. Мазкур ҳолат юзасидан Фавқулодда вазиятлар вазирлиги матбуот хизмати раҳбари ўринбосари Самандар Ҳикматиллаев Zamon.uz'га изоҳ берди.
Унда айтилишича, воқеа бугун, 11 сентябрь куни соат 14:36 да Юнусобод тумани Бодомзор кўчасида жойлашган “Грант сомса” ошхонасида содир бўлган.
Тошкет шаҳар ФВБнинг 6 та ёнғин-ўчириш экипажи соат 14:39 да воқеа жойига етиб борган. Ёнғин соат 15:02 да ўраб олиниб, соат 15:19 да тўлиқ бартараф этилган.
Ёнғин натижасида ошхонанинг тахминан 150 кв.м. майдонида том ва шифт қисми ёниб зарарланган.
Ҳодиса оқибатида ҳалок бўлган ва жабрланганлар йўқ.
Ҳозирда ёнғин сабаби ва моддий зарар миқдори аниқланмоқда.
Эслатиб ўтамиз, бундан аввал Намаманган давлат университетига қарашли талабалар ётоқхонасида ёнғин содир бўлгани ҳақида хабар берган эдик.
Муножат Валиева
