Мэнни Пакьяо боксдаги фаолиятини якунлади (видео)
Бокс бўйича 8 вазн тоифасида собиқ жаҳон чемпиони, филиппинлик боксчи Мэнни Пакьяо Toni Talks кўрсатувида спорт фаолиятини якунлаганини тасдиқлади.
Боксчи рингдаги охирги жангини 2021 йил 22 августда WBA’нинг суперчемпион унвони учун кубалик Йорденис Угасга қарши ўтказиб, мағлубиятга учраган. Бу Пакьяонинг 2019 йил июль ойида WBA чемпионлик камари учун Кейт Турманни мағлубиятга учратганидан кейинги биринчи жанг эди.
“Боксчилик фаолиятим якунланди, мен бу қарорни бокс билан анчадан бери шуғулланишим ва оилам менга у билан етарлича шуғулланганимни айтаётгани сабабли қабул қилдим. Мен Филиппин президенти лавозими учун кураш олиб боришга чорловни кўрқмай қабул қиламан. Бизга тараққиёт керак, биз камбағалликни енгишимиз лозим. Бизга ҳукуматимиз халққа ҳалол ва очиқ-ойдин хизмат қилиши керак. Мавриди келди ва мен ўз зиммамга етакчилик юкини олишга тайёрман”, дейди боксчи.
Айни вақтда Пакьяо Филиппин сенати аъзоси ҳисобланади, унинг ваколатлари муддати 2022 йилда якунланади.
Ҳозирда Филиппин президенти Родриго Дутерте ҳисобланади. Мамлакат конституциясига кўра, Дутерте иккинчи муддатга президент лавозимини эгаллай олмайди. Шу сабабли у бўлғуси сайловларда вице-президент лавозими учун курашмоқчи.
Маълумот учун, Мэнни Пакьяо икки йиллик танаффусдан сўнг рингга қайтди. Танаффусдан сўнгги илк рингида мағлубиятга учради. Кубалик Йорденис Угас бир овоздан қабул қилинган қарор билан ғалаба қозониб, WBA (супер) вазн тоифасида чемпионлик унвонини сақлаб қолди.
Эслатиб ўтамиз, аввалроқ саккизта вазн бўйича бокс собиқ чемпиони Мэнни Пакьяо ва WBC ва IBF йўналишлари чемпиони Эррол Спенс ўртасидаги жанг бекор қилингани ҳақида хабар берилганди.
