Пермда отишма содир этган собиқ талабага умрбод қамоқ жазоси берилиши мумкин
Россиянинг Пермь давлат университети ҳуқуқшунослик факультетида суд экспертизаси йўналишида ўқиган собиқ талаба Темур Бекмансуров қуролланган ҳолатда ўқув биноси ичига бостириб кирди.
Туркияда ишлаб чиқарилган 12х76 ўлчамли "Huglu Atrox" милтиғи билан сабоқ олаётган талабаларга қарата ўқ узган. Бунинг оқибатида 8 киши ҳалок бўлган, 24 киши яраланган.
Ижтимоий тармоқлардаги хабарларга кўра, отишмада ўзбек фуқаролари ҳам бўлганлиги турли миш-мишларга сабаб бўлди. Аслида рўй берган отишмада жароҳатланган ёки ҳалок бўлганлар орасида Ўзбекистон фуқаролари қайд этилмаган.
Воқеа пайтида маърузани давом эттирган ўқитувчи ўз ҳаракатларини қуйидагича тушунтирди:
"Талабалар саккизинчи бинода қуролланган одам борлиги ҳақида хабар беришни бошлаганда, улар суҳбат хоналарида бу маълумотни кўришди, мен дарҳол деканга, менежментга қўнғироқ қилдим. Декан менга ўқишни давом эттиришимни айтди. Бундан ташқари, бу маълумот расмий бўлмаган ", - деди Сёромятников.
Собиқ талаба қайси ва нима мақсадда бостириб киргани ҳали маълум қилинмаган. Талабалар бинодаги огоҳлантириш тугмаси ишламагани оқибатида бинонинг иккинчи қавати деразасидан қоча бошлаган.
"RT" хабарига кўра, отишма содир этган йигитнинг отаси Марат Бекмансуров (дастлабки маълумотларга кўра, у — ҳарбий хизматчи) ҳозирда бошқа шаҳарда экани ва аниқ ҳеч нарса дея олмаслигини, чунки воқеа жойида айнан нима бўлганини билмаслигини айтган.
Унинг сўзларига кўра, яқинда тергов жараёнида иштирок этиш учун Пермга боришни режалаштирган. "Мен бўлган ишдан ҳамон ҳайратдаман, ўзимга келолмаяпман", — дея таъкидлаган эркак воқеа ҳақида рафиқасидан билганини қўшимча қилган ҳолда. Таъкидланишича, ўғли компьютерга қизиққан ва сайр қилишни унчалик ёқтирмаган. Онасининг айтишича, у ўғлини охирги марта ишга кетишидан олдин кўрган. Ўғли унга хайрли тонг тилаб, дарсга тайёрлана бошлаган. У доим тинч ва хотиржам йигит бўлган ва вақтини, асосан, уйда ўтказган.
Қайд этилишича, Темур Бекмансуровга нисбатан Россия Жиноят кодексининг "Қотиллик" моддаси бўйича жиноят иши олиб борилаётган бўлиб, унга кўра, минимал жазо 8 йиллик, максимали эса умрбод қамоқ жазоси бўлиши мумкин.
Эслатиб ўтамиз, аввалроқ Нигерия шимоли-ғарбидаги мактаб-интернатдан қуролланган номаълум шахслар 140 нафар ўғирлаб кетишганди. Бундан ташқари, Қаршида оммавий жанжал оқибатида 19 ёшли спортчи тўппончадан ўқ егани ҳақида хабар берилган эди.
Чўлпоной Аҳмедова
