РФда Ўзбекистон фуқароси Украина фойдасига жосуслик қилишда айбланмоқда
Россия Федерал хавфсизлик хизмати Ўзбекистон фуқаросини қўлга олди. У Украина махсус хизматлари билан ҳамкорликда айбланмоқда.
Маълум қилинишича, Россия ФХХ Брянск вилояти бўйича чегара бошқармаси ходимлари Украина билан давлат чегарасини ноқонуний кесиб ўтган 1981 йилда туғилган Ўзбекистон фуқаросини гиёҳвандликдан мастлик аломатлари билан қўлга олган.
Тинтув ўтказилганда ундан фото, видео ва аудиофиксация қилиш учун махсус техник воситалар, шунингдек, катта эҳтимол билан кукун кўринишида гиёҳванд модда топилган.
Дастлабки маълумотларга кўра, ушбу шахс 2019 йилдан бери Украина ҳуқуқ-тартибот идоралари билан ҳамкорлик қилиб келаётгани аниқланган. У Россияга ноқонуний мигрант кўринишида киришга ҳаракат қилган. Хусусан, жиноий доиралар вакиллари билан боғланиб, 27 минг гривен пул мукофоти эвазига унга Россия ҳудудига ноқонуний ўтишда ёрдам беришни сўраган.
Ҳозирда ҳолат бўйича жиноят иши қўзғатилган. Ўз навбатида, Украина хавфсизлик хизмати ҳам чегара бузган шахсни қайтаришни сўраган.
Жаҳонгир Қўзиев
