Шавкат Мирзиёев Си Цзиньпинни ХХР ташкил топган кун муносабати билан табриклади
Президент Шавкат Мирзиёев Хитой Халқ Республикаси Раиси Си Цзиньпинга миллий байрам - ХХР ташкил топган кун муносабати билан табрик йўллади. Бу ҳақда Президент матбуот хизмати хабар бермоқда.
Мустаҳам соғлик, оилавий бахт ва катта муваффақиятлар, дўст Хитой халқига эса тинчлик-осойишталик ва равнақ тилагани қайд этилган.
“Хитойнинг глобал хавфсизлик ва барқарорликни таъминлаш, янги таҳдид ва хатарларга, шу жумладан иқлим ўзгариши ва COVID-19 пандемиясига қарши самарали курашишдаги фаол саъй-ҳаракатлари ва салмоқли ҳиссаси энг юксак эътирофга муносиб.
Кейинги йилларда Ўзбекистон ва Хитой ўртасидаги ўзаро ҳурмат, ишонч ва қўллаб-қувватлаш тамойилларига асосланган дўстлик ва ҳар томонлама стратегик шериклик муносабатлари изчил ривожланиб бораётганини катта мамнуният билан қайд этмоқчиман.
Ўртамиздаги дўстона, ўзаро ишончга асосланган мустаҳкам шахсий муносабатларимизни чин дилдан эъзозлайман. Сизнинг кўп қиррали Ўзбекистон-Хитой ҳамкорлигига қаратаётган алоҳида эътиборингизни юксак қадрлайман.
Ишончим комил, Сизнинг бўлажак давлат ташрифингиз ва Шанхай ҳамкорлик ташкилотининг Ўзбекистондаги саммитида иштирокингиз мамлакатларимиз ўртасидаги кенг кўламли шерикликни янги босқичга кўтаришга хизмат қилади”, - дейилади мактубда.
Аввалроқ давлатимиз раҳбари Шавкат Мирзиёев ва Туркманистон президенти Гурбангули Бердимуҳамедовнинг телефон орқали мулоқоти, Қозоғистоннинг биринчи президенти — элбоши Нурсултон Назарбоевни 81 ёши билан табриклагани ҳамда Шавкат Мирзиёев Жаҳон банки вице-президенти Анна Бьерде бошчилигидаги делегацияни қабул қилгани ҳақида хабар берилганди.
