Оғир атлетика бўйича жаҳон чемпионати бронза медаль билан бошланди
Хабарингиз бор, Саудия Арабистонининг Жидда шаҳрида оғир атлетика бўйича ўсмирлар ўртасидаги жаҳон чемпионатига старт берилди.
Ушбу баҳсларда Ўзбекистон терма жамоаси ўзининг илк медалини қўлга киритди. Унда ҳамюртимиз Ҳусинбой Матрасулов бронза медалига сазовор бўлди.
61 кг вазн тоифасида баҳс олиб борган Матрасулов даст кўтаришда 119 кг натижа кўрсатиб, мазкур йўналиш бўйича учинчи натижани қайд этди. Қолаверса, силтаб кўтаришда 133 кг, икки кураш бўйича эса 252 кг кўрсаткич билан мусобақани якунлади.
Афсуски, кейинги икки дастур бўйича қайд этилган натижалар совринли ўринлар учун бироз камлик қилди.
Аввалроқ Токио-2020 олимпиада мусобақаларида оғир атлетика бўйича ўзбекистонлик Муаттар Набиева рекорд натижа қайд этгани ҳақида хабар берилганди.
Чўлпоной Аҳмедова
