Гватемалада 100 дан ортиқ муҳожир бир неча кун ёпиқ контейнерда қолиб кетди
Гватемалада муҳожирлар ортилган ёпиқ контейнер аниқланди. Маълум бўлишича, улар Гаити, Непал ва Гана фуқаролари бўлган.
Мексика орқали АҚШга ўтказиб қўйиш шарти билан пулларини олган контрабандачилар уларни манзилга етказмай, ёпиқ контейнерда ўз ҳолига ташлаб кетган.
Муҳожирлар одамларни ёрдамга чақириш учун бақиришган, контейнер деворларини уришган. Аммо уларни ҳеч ким эшитмаган. Муҳожирлар шу тарзда бир неча кун сувсиз, овқатсиз қолиб кетган.
Уларни яқин атрофдан ўтган бир эркак эшитиб қолган ва дарҳол полицияга хабар қилган. Ҳозирда уларни ўз юртига қайтариш ишлари кўрилмоқда.
Суриштирув давомида муҳожирларнинг ҳеч бирида шахсини тасдиқловчи ҳужжат бўлмагани маълум бўлди.
Аввалроқ Ҳиндистонда 2,5 минг одам вакцина ўрнига шўр сув билан эмлангани ҳамда Гватемалада маҳбуслар 18 кишини гаровга олгани ҳақида хабар берилганди.
Муножат Валиева
