Солиқларни энди бўлиб-бўлиб тўлаш имкони мавжуд

 

 

Жумладан, Кодекснинг 99-моддасига киритилган ўзгартиришга кўра, солиқларни, шунингдек, айланмадан олинадиган солиқни мол-мулкни гаровга қўймай бўлиб-бўлиб тўлаш тартиби белгиланди. Бунинг учун кафиллик ёки банк кафолати бўлиши шарт эмас. Даромад солиғи, ижтимоий солиқ, тўлов манбаидан олинадиган фойда солиғи бундан мустасно.

 

Шунингдек, Кодекснинг 100-моддасига ҳам қўшимча киритилди. Энди солиқ қарзини муддатида тўлашга молиявий имконияти етмайдиган манфаатдор шахсларга солиқларни бўлиб-бўлиб тўлаш имконияти берилди. Бунда унинг ташкилоти 3 йилдан ортиқ вақт давомида фаолият юритган, шу вақтгача солиқларни ўз вақтида тўлаган бўлиши лозим.

 

 Кодекснинг 378-моддасига киритилган ўзгартиришларга кўра, бундан буён солиқ тўловчининг Ўзбекистон Республикасининг профессионал (яъни, касб-ҳунар мактаблари, коллежлар, техникумлар) ва олий таълим ташкилотларида таълим олиш учун  йўналтириладиган даромадлари солиққа тортилмайди. Бунда шахс 26 ёшга ёшга тўлмаган фарзандларининг таълим олиш учун тўланадиган суммаси назарда тутилади. Бунга тўловчи ўзининг, аёл киши турмуш ўртоғининг ўқишига тўлайдиган суммалари ҳам киради. 

 

Маълумот учун: илгари ушбу имтиёз фақат олий таълим бўйича татбиқ этилган.

 

Бундан аввал 25 ёшдан ошмаган ходимлар учун ижтимоий солиқ суммаси давлат бюджетидан қопланиши, тадбиркорларнинг солиқ ҳисоботини муддатида тақдим этмаганлиги учун молиявий санкциялар қўллаш бекор қилиниши ҳамда солиқ тўлашдан бўйин товлаган шахсларга қандай жавобгарликлар белгилангани ҳақида хабар берилганди.

 

Оламгир Абдиев