Солиқ тўлашдан бўйин товлаган шахс жавобгарликка тортилишидан хабарингиз борми?
Қонунчиликка кўра, солиқ олиниши керак бўладиган фойда (даромад)ни ёки бошқа объектларни қасддан яшириш, шунингдек, камайтириб кўрсатиш жавобгарликка тортилишга сабаб бўлади.
Бундан ташқари, солиқлар ва шунга ўхшаш бошқа мажбурий тўловлар тўлашдан атай бўйин товлаш ҳам жарима солинишига олиб келади. Жумладан, юқоридаги ҳатти-ҳаракатлар учун фуқаролардан БҲМнинг 3 бараваридан 5 бараваригача, мансабдор шахслардан эса 5 бараваридан 7 бараваригача миқдорда жарима ундириб олинади.
Агар худди шундай ҳуқуқбузарлик бир неча марта содир этилган бўлса, унда жариманинг миқдори ҳам кўпаяди. Бу ҳолатда фуқароларга БҲМнинг 5 бараваридан 10 бараваригача, мансабдор шахсларга эса 10 бараваридан 15 бараваригача миқдорда жарима солинади.
Шу ўринда, даромадлар тўғрисида декларация тақдим этишдан бўйин товлаш, декларацияни ўз вақтида тақдим этмаслик ёки унда атайин нотўғри маълумотларни тақдим этиш ҳам БҲМнинг 1 бараваридан 3 бараваригача миқдорда жаримага олиб келади.
Эслатиб ўтамиз, бундан аввал айрим ҳуқуқбузарликлар бўйича жарималар миқдори камайтирилаётгани ҳамда 25 ёшдан ошмаган ходимлар учун ижтимоий солиқ суммаси давлат бюджетидан қопланиши ҳақида хабар берилганди.
Оламгир Абдиев
