“Суюнчи пули” энди банк пластик картасига ҳам ўтказиб берилади
Фарзанд туғилганда бериладиган бир марталик нафақа тўлови Халқ банки томонидан нақд пул шаклида амалга оширилаётган эди. Бу эса ФҲДЁ бўлимларида жойлашган банк кассалари олдида узундан-узун навбатлар юзага келишига сабаб бўлмоқда.
Давлат хизматлари агентлиги томонидан фуқароларга янада қулайлик яратиш мақсадида, “ФҲДЁнинг ягона электрон архиви” ахборот тизимида фарзанд туғилганда бериладиган бир марталик нафақа тўлови (“суюнчи пули”) ни ота-онадан бирининг банк пластик карточкасига ўтказиб бериш имконияти яратилди. Албатта, бу тизим ихтиёрий тарзда амалга оширилади.
Бунда ФҲДЁ бўлимининг масъул ходими ота ёки онанинг хоҳишига асосан фаол ҳолатда бўлган банк пластик карточкасини махсус белги орқали танлайди. Шундан сўнг бир марталик тўловни банк пластик картасига йўналтиради.
Халқ банки томонидан “суюнчи пули” қисқа муддатда фуқаронинг банк пластик карточкасига ўтказиб берилади.
Аввалроқ “Болалар пули” бола сонига қараб белгиланиши, фарзандли бўлган талабага таълим муассасаси бир марталик нафақа пули бериши ҳамда Ногирон фарзанди бор оналарга пенсияга чиқишида қандай имтиёзлар белгиланиши ҳақида хабар берилганди.
Оламгир Абдиев
