АҚШ томонидан тайёрланган афғон ҳарбийлари ИШИД сафига қўшилмоқда. Нега?

 

АҚШ томонидан тайёрланган ва Афғонистонда қолиб кетган айрим собиқ афғон ҳарбийлари ИШИД сафига қўшилмоқда. Бу ҳақда “The Wall Street Journal” нашри хабар берди.

 

Маълумотларга кўра, ҳозирда ИШИД сафига қўшилган собиқ ҳарбийлар сони у қадар кўп эмас, аммо улар кун сайин кўпайиб бормоқда. “The Wall Street Journal” улар террорчи гуруҳ жанговор қудратини сифат жиҳатдан ошириб бормоқда. Бу, айниқса, разведка маълумотларини тўплаш ҳамда жанг олиб бориш методларида катта устунлик тақдим этади.

 

Собиқ ҳарбийларнинг ИШИД сафига қўшилишига, энг аввало, уларнинг “Толибон” томонидан таъқиб қилиниши сабаб бўлмоқда. Афғонистон разведка агентлигининг собиқ раҳбари Раҳматулло Набилнинг сўзларига кўра, террорчи гуруҳ айрим ҳудудларда собиқ ҳарбийларга бир қатор имкониятлар тақдим этган. Хусусан, ИШИД сафига янги қўшилганларга 30 минг афғоний (340 доллар) берилади. “Толибон” сафига қўшилган собиқ ҳарбийларнинг аксарияти эса бир неча ойдан буён маош олмаган.

 

Шу билан бирга Раҳматулло Набил "Толибон"га қарши реал қаршилик кучлари мавжуд бўлганида, собиқ ҳарбийлар қаршилик сафига қўшилган бўлиши мумкинлигини таъкидлади.

 

Бундан аввал Покистоннинг Афғонистон бўйича позицияси маълум қилинганди. Шунингдек, ИШИД Ироқ армиясига ҳужум уюштиргани хабар берилганди.

 

Жаҳонгир Қўзиев