Покистон ва Хитой Афғонистон масаласи бўйича учрашувда иштирок этмаслиги маълум қилинди
Бу учрашув Ҳиндистон ташаббуси билан ўтказилмоқда.
Хитой 10 ноябрь куни Ҳиндистон ташаббуси билан ўтказиладиган Афғонистонда хавфсизлик масаласи бўйича мулоқотда иштирок этишдан бош тортди. Бу ҳақда The Hindu газетаси хабар берди.
Газета манбаларига кўра, миллий хавфсизлик масалалари бўйича маслаҳатчилар ёки хавфсизлик кенгаши котиблари даражасидаги учрашувда Хитой вакили ўз графиги тиғизлиги сабабли иштирок эта олмаслигини маълум қилган.
“Биз Пекиннинг ушбу мулоқотда иштирок этишидан манфаатдор эдик. Сабаби бу Афғонистондаги вазиятнинг номаълумлиги ортидан келиб чиқадиган таҳдидларга бўлган умумий тушунчаларнинг шаклланишига ёрдам берарди”, – деган нашр манбаси.
Бундан аввал Покистон миллий хавфсизлик агентлиги раҳбари Моид Юсуф ҳам учрашувда иштирок этмаслигини маълум қилган.
Ҳиндистон ТИВ маълумотларига кўра, Афғонистонда хавфсизлик масаласи бўйича минтақавий мулоқотда Ўзбекистон, Эрон, Қозоғистон, Қирғизистон, Россия, Тожикистон, Туркманистон ва Россия вакиллари иштирок этади.
Аввалроқ “Толибон” Покистонга дипломатик ёрдам бераётгани ҳамда "Толибон" янги тайинловларни амалга оширгани ҳақида хабар қилинганди.
Жаҳонгир Қўзиев
