“АҚШга мурожаат қилган эдик”: Эрон ТИВ Ўзбекистоннинг норозилик нотасига жавоб берди
Эрон элчихоналарининг Самарқанд мероси ҳақидаги постлари юзасидан юзага келган дипломатик баҳсга Теҳрон изоҳ берди.
Эрон Ташқи ишлар вазирлиги расмий вакили Исмоил Бақоий Самарқанднинг тарихий-маданий меросига оид баҳсли постлар ҳамда Ўзбекистон ТИВ томонидан топширилган норозилик нотасига изоҳ берди. Унинг айтишича, айрим Эрон элчихоналари томонидан ижтимоий тармоқларда эълон қилинган постлар АҚШга мурожаат сифатида ёзилган.
Исмоил Бақоийнинг таъкидлашича, Эрон ва Ўзбекистон ўртасидаги муносабатлар узоқ тарихга эга ва Теҳрон бу алоқаларга катта аҳамият беради.
У икки мамлакатни боғлаб турувчи умумий мерос халқлар ўртасидаги дўстона муносабатларни давом эттириш ва мустаҳкамлашга хизмат қилишига ишонч билдирган.
Шунингдек, Эрон ТИВ вакили айрим дипломатик ваколатхоналар томонидан эълон қилинган, Ўзбекистон томонининг эътирозига сабаб бўлган постларга ҳам тўхталган.
«Айрим элчихоналаримиздаги дўстларимиз ўз постларини АҚШ томонига мурожаат сифатида эълон қилишган эди», — деган у.
Эслатиб ўтамиз, 23 октябрь куни Эроннинг Ўзбекистондаги элчиси Муҳаммад Али Искандарий Ўзбекистон Ташқи ишлар вазирлигига чақирилиб, унга расмий норозилик нотаси топширилган эди. Бунга Эроннинг бир қатор давлатлардаги элчихоналари X ижтимоий тармоғида Самарқанднинг тарихий-маданий меросини бирёқлама ва сиёсий мазмунда талқин қилувчи постлар эълон қилгани сабаб бўлган.
Ўзбекистон ТИВ Самарқанд, Бухоро ва Хива каби тарихий шаҳарлар мероси ўзбек халқининг кўп асрлик тарихи ва давлатчилик анъаналарининг ажралмас қисми эканини таъкидлаб, тегишли постларни ўчириш ҳамда келгусида бундай ҳолатларга йўл қўймасликни талаб қилган.
Баҳс АҚШ давлат котиби Марко Рубионинг Самарқандга ташрифи ва Регистон майдонидан эълон қилган видеомурожаатидан кейин юзага келган. Эроннинг айрим дипломатик ваколатхоналари бунга жавобан Самарқанд меъморчилигини форс ёки Эрон-ислом цивилизацияси мероси билан боғловчи постлар жойлаштирган.
Маълумот учун, Эроннинг турли давлатлардаги элчихоналари томонидан Самарқанд ҳақида эълон қилинган постлар кейинчалик ўчириб ташланган.
