Россия иш берувчилари Тошкент ва Андижонда танлов ўтказмоқда
Танловдан муваффақиятли ўтган ва тиббий кўрик натижалари ижобий чиққан фуқаролар жўнатилади.
Ташқи меҳнат миграцияси агентлигининг хабар қилишича, Тошкент ва Андижон шаҳридаги "Ишга марҳамат" мономарказида хорижда ишлаш истагида бўлган фуқаролар учун танлов ўтказилмоқда.
Танловда Россия Федерациясининг иш берувчи компаниялари қурилиш соҳасининг арматурачи, ғишт терувчи, бетончи, ёрдамчи ишчи, чилангар, электргаз пайвандчи, бўёқчи-сувоқчи каби йўналишлар ўрин олган.
Қурилиш соҳасида меҳнат фаолиятини амалга ошириш учун Ўзбекистон фуқароларини Россия Федерациясига жалб қилиш бўйича пилот лойиҳаси доирасида ташкил этилган. Бунда номзодлар касбий малака ва тил билиш даражасига кўра суҳбат асосида иш берувчи вакиллари томонидан танлаб олинади.
Эслатиб ўтамиз, меҳнат мигрантларининг Россияга кириши соддалаштирилганди.
Аввалроқ меҳнат миграциясига кетаётган фуқароларга компенсация тўланиши, COVID-19'га қарши эмланган меҳнат мигрантларини Россияга юбориш пилот лойиҳаси бошлангани, 72 нафар юртдошимиз Россияда қишлоқ хўжалиги ишларига жойлаштирилгани, Россияда мигрантларга махсус чипли пластик карталар тарқатилиши ҳамда Россияда миграция тўғрисида ягона ҳужжат жорий этилиши ҳақида хабар берилганди.
