Ўзбекистондан хорижга кетадиган муҳожирларга 1000 АҚШ доллар эквивалентида кредит берилади
Ушбу кредитни олиш учун Ташқи меҳнат миграцияси агентлиги билан шартнома тузиш лозим.
Мазкур кредит мамлакатдан ташқарида вақтинчалик меҳнат фаолиятини бошлаш билан боғлиқ дастлабки харажатларни тўлаш учун мўлжалланган.
Бунда меҳнат мигрантларига хорижда ишга жойлашиш билан боғлиқ харажатларни тўлаш учун банк куни давомида тез расмийлаштирилган ҳолда 2 миллион сўм миқдорида 1 йил муддатга берилади:
-2020 йил 1 январдан Марказий банкнинг қайта молиялаш ставкасида;
- 2021 йил 1 январдан тижорат банклари томонидан бозор тамойиллари асосида мустақил равишда ўрнатиладиган ставкада.
Кредит учун талаб қилинадиган ҳужжатлар:
➖банк томонидан белгиланган шаклдаги ариза;
➖қарз олувчи ва қўшимча тўловчининг паспорти;
➖меҳнат органининг илтимосномаси.
Суғурта компанияларига йилига бир маротаба хорижда вақтинчалик меҳнат фаолиятини амалга ошириш даврида фуқаролар ҳаёти ва соғлиғини ҳамда бошқа таваккалчиликларни суғурталаш бўйича суғурта мукофоти суммасини қоплаш учун суғурталанган ҳар бир меҳнат мигранти учун 50 минг сўм миқдорида бир марталик субсидиялар ҳам берилади.
Эслатиб ўтамиз, аввалроқ Россиядаги меҳнат муҳожирлари учун патент нархи ўзгаргани ҳамда Россия ва Ўзбекистон ўртасида имзоланган меморандум муҳожирликдаги болалар ҳуқуқларини ҳимоя қилиши ҳақида хабар берилганди.
Чўлпоной Аҳмедова
