Умумтаълим мактабларида янги йил байрамини нишонлаш билан боғлиқ ҳеч қандай чекловлар йўқ — ХТВ
Халқ таълими вазирлиги мактабларда янги йил байрамини нишонлаш билан боғлиқ хабарномага қўшимча изоҳ берди.
"Халқ таълими вазирлиги томонидан умумтаълим мактабларига Янги йил байрамини режалаштириш ва ўтказиш билан боғлиқ чеклов юзасидан тегишли хати нотўғри талқин қилинганини маълум қиламиз", – дейилади вазирлик изоҳида.
Унда айтилишича, умумтаълим мактаблари ҳудудида янги йил байрамини нишонлаш билан боғлиқ ҳеч қандай чекловлар мавжуд эмас.
Бироқ вазирлик ахборотида таъкидланишича, мактабларда пул йиғимлари ҳамда ота-оналарнинг эътирозларини олдини олиш мақсадида ресторан, кафе ва бошқа умумий овқатланиш шаҳобчаларида мактаб ўқувчиларига Янги йил байрамини ўтказиш тақиқланади.
“Республика махсус комиссиясининг турли хил корпоратив байрам ва кўнгилочар тадбирларни ташкил этиш билан боғлиқ тақиқлар вазирлик, идора ва бошқа давлат ташкилотларига татбиқ этилганлигини маълум қиламиз”, - дейилади Халқ таълими вазирлиги баёнотида.
Аввалроқ Янги йил тадбирлари фақат бошланғич синф ўқувчилари учун ўтказилиши ҳақида хабар берилганди.
Оламгир Абдиев
