Тошкентда қўлбола ўт ўчириш мосламасини портлатганларга жиноят иши қўзғатилди
Аввалроқ ҳодиса оқибатида 3 киши жароҳатлангани хабар қилинганди.
Бугун, 1 январь куни Тошкент шаҳридаги «Самарқанд дарвоза» савдо мажмуаси олдида аҳоли йиғилиб, қўлбола ўт ўчириш мосламасини портлатишгани ва оқибатда 3 киши яралангани ҳақида хабар берилганди. Ҳолат юзасидан Шаҳар ички ишлар Бош бошқармаси кўшимча маълумот берди.
Маълум қилинишича, Шайхонтоҳур тумани ИИО ФМБ Тергов бўлими томонидан 4 нафар фуқарога Ўзбекистон Республикаси Жиноят кодексининг 250-моддаси (“Портлаш хавфи бўлган моддалар ёки пиротехника буюмларидан фойдаланиш қоидаларини бузиш”) аломатлари билан жиноят иши қўзғатилган.
Ҳозирда тергов ҳаракатлари давом этмоқда.
Эслатиб ўтамиз, аввалроқ Самарқанд вилоятининг Оқдарё туманидаги тамаддихоналардан бирида кучли портлаш содир бўлганди.
