Cаакашвили янги талабларини маълум қилди
Акс ҳолда у яна очликни бошлаш билан таҳдид қилган.
Грузия собиқ президенти Михаил Саакашвили ўз камерасига чет эллик врачларни киритишни талаб қилди. Бу ҳақда 3 январь куни унинг адвокати Шота Тутберидзе журналистларга маълум қилган.
“Биз Михаил Саакашвилининг даволаниши жараёнига АҚШ, Украина ва Нидерландия врачларининг дарҳол жалб қилинишини талаб қиламиз. Бундан ташқари, бизнинг собиқ президент билан махфий мулоқот қилиш имконимиз йўқ, бу эса адвокат ва ҳимоядаги шахснинг фундаментал ҳуқуқларининг бузилиши ҳисобланади”, – деган у.
Акс ҳолда собиқ президент очликни қайта тиклаши маълум қилинган.
Маълумот ўрнида: Михаил Саакашвили 2004-2013 йилларда Грузия президенти бўлган. 2013 йилда мамлакатни тарк этган. Шундан кейин у Украина фуқаролигини қабул қилди.
2021 йил 1 октябрь куни Саакашвили қўлга олинди. У Грузияга маҳаллий ўзини ўзи бошқариш органларига сайлов арафасида кириб келган.
Аввалроқ Саакашвили тарафдорлари очликни тўхтатгани ҳақида хабар берилганди.
Жаҳонгир Қўзиев
