2021 йилнинг энг бой россиялик миллиардерлари рўйхати тузилди. Алишер Усмонов нечанчи ўринда?
Bloomberg Billionaires Index(BBI) рейтингига кўра, ўтган 2021 йилда россиялик миллиардерларнинг умумий бойлиги 56,215 миллиард долларга ошган.
Таҳлилларга кўра, “Новатэк”нинг ҳаммуаллифи Леонид Михельсон “2021 йилнинг энг бой россиялик миллиардери” номини олган. Бойлиги ўтган йил ҳисобида 7,68 миллиард долларга ортган Михельсоннинг умумий бойлиги айни вақтда 32,4 миллиард долларга баҳоланмоқда.
Ундан кейинги ўринда “Норильск Никель” кон-металлургия компанияси президенти Владимир Потанин жой олган. Потанин эски йилда 846 миллион доллар қўшимча даромад қилган. Айни вақтда унинг бойлиги 30,9 миллиард долларга етганлиги айтилмоқда.
Энг бой россиялик миллиардерлар учлигини “НЛМК” пўлат компаниясининг бенефициари Владимир Лисин якунлаб берган. У ўтган йили 4,14 миллиард доллар даромад қилиб, ўз бойлигини 28 миллиард долларга етказиб олган.
Қолган ўринларни эса “Лукойл” нефт компанияси эгаларидан бири Вагит Алекперов (22,8 миллиард доллар), “Новатэк” улуши эгаларидан бири Геннадий Тимченко (22,4 миллиард доллар), USM Holdings асосчиси ва эгаси Алишер Усмонов (21,3 миллиард доллар), ҳамда “Ренова” гуруҳи ва “Сколково” жамғармаси президенти Виктор Вексельберг (18,5 миллиард доллар) эгаллаган.
Шунингдек, рейтингдаги энг бадавлат россияликлар ўнталигига ўтган йили 420 миллион доллар зарар кўрган Роман Абрамович (18 миллиард доллар) ва капитали 622 миллион долларга камайган Андрей Мельниченко (17,5 миллиард доллар) ҳам киритилган.
Маълумот учун, Алишер Усмонов ўтган йил ҳисобида 145 миллион доллар қўшимча фойда ишлаган.
Аввалроқ Дональд Трамп энг бой америкаликлар рўйхатидан жой ололмагани ҳамда дунёнинг энг бой одамлари рўйхати ўзгаргани ҳақида хабар берилганди.
Оламгир Абдиев
