Дональд Трамп энг бой америкаликлар рўйхатидан жой ололмади
АҚШнинг 45-президенти Forbes журналининг чорак асрда биринчи марта энг бой америкаликлар рўйхатига кира олмади.
Қайд этилишича, 400-ўриндан жой олиши учун унга “атиги” 400 миллион доллар етмай қолган.
Forbes баҳолашича, Трампнинг бойлиги 2,5 миллиард долларни ташкил этади. Аммо бу йил “миллиардерлар клуби”га кириш “баҳоси” 2,9 миллиард долларга кўтарилди.
Биринчи ўрин кетма-кет тўрт йилдан бери "Amazon" асосчиси Жефф Безосга насиб қилмоқда. Унинг капитали бир йилда 22 миллиард долларга ўсиб, 201 миллиардга етди. Иккинчи ўринни 190,5 миллиард доллар бойлиги билан Tesla ва SpaceX асосчиси Илон Маск эгаллади. Учинчи ўринда эса 134,5 миллиард капитали билан Facebook асосчиси Марк Цукерберг қайд этилди.
Трамп Forbes'нинг 400 ўринли рўйхатидан тушиб қолган биринчи одам эмас. У билан бирга машҳур телебошловчи Опра Уинфри, бизнесмен ва инвестор Рональд Перельман ҳам энг бой америкаликлар рўйхатини тарк этган.
Рейтингда 44 та янги фамилия пайдо бўлган.
Аввалроқ Facebook, WhatsApp ва Instagram'нинг бир соат ишламаслиги жаҳон иқтисодиётига 161 миллион доллар зарар етказгани ҳақида хабар берилганди.
Шарофат Маҳмудова
