Исландияда собиқ электр ходими икки қўл ва елка кўчириб ўтказилган биринчи одам бўлди
Унинг жигари ҳам трансплантация қилинган.
Исландиялик Феликс Гетарссон икки қўли ва елкаси кўчириб ўтказилган биринчи одам бўлди. Унинг иккала қўли бундан 23 йил олдин ампутация қилинган. Ўшанда у электр таъминотидан ўчирилмаган кабельни ушлаб, 11 000 вольт кучланиш олган.
У шифохонада 3 ой комада ётган. Шифокорлар Феликснинг қўлларини аввал тирсаккача кесиб ташлашган, аҳвол ёмонлашгач, икки қўли ва бир елкаси қисман кесиб ташланган.
Феликс ўзига келгач, ногирон бўлиб қолганини кўтара олмаган ва ичкиликка берилиб кетган. Бунинг оқибатида унда жигар циррози ривожланган. Шифокорлар унинг жигарини ҳам кўчириб ўтказишга мажбур бўлишди. Шундан сўнг у ҳаётини ўзгартиришга киришди. Тиббиётдаги сўнгги янгиликлардан хабардор бўлиш учун Феликс инглиз тилини ўрганди, кейинчалик Францияга кўчиб ўтди.
2021 йилда кутилган воқеа бўлди: Феликсга қўнғироқ қилиб, қўлларни кўчириб ўтказиш операциясига тайёргарлик кўришни айтишди. Операция муваффақиятли ўтди. Энди Феликс узоқ муддат реабилитация ўташи керак. У ижтимоий тармоқларда дастлабки натижаларини кўрсатмоқда.
Аввалроқ дунёда биринчи марта инсонга чўчқа юраги муваффақиятли кўчириб ўтказилган эди.
