Хорватия президенти Бош вазирни "Украина агенти" деб атади
Шунингдек, у Россиянинг душмани ёки Украинанинг дўсти эмаслигинини айтиб ўтган.
Хорватия президенти Зоран Миланович Украина Евроиттифоқ томонидан алданаётганини айтди. У Брюсселнинг Киевга нисбатан муносабатини масъулиятсизлик деб баҳолади.
"Брюсселнинг бошқа давлатлар устидан кулган бюрократлари Украина устидан ҳам кулмоқда. Улар туман сотиш ва қандайдир статусни ваъда қилиш билан шуғулланади. ЕИ маълумотига кўра, мамлакат ўта оғир аҳволда. Қачонлардир у ривожланган давлат бўлган, аммо ҳозир Украина ЯИМнинг аҳоли жон бошига тушадиган миқдори Косово билан бир хил даражада. Бу Европа ёки Брюссель сиёсатчиларининг муваффақиятими?", - деди Миланович.
Олдинроқ президент Украинани коррупцияга энг кўп ботган давлат деб атаган.
Президент сўзлари ортидан Хорватия бош вазири Андрей Пленкович Украинадан расман узр сўради ва ҳукумат позицияси президентнинг қараши билан бир-бирига мос келмаслигини айтди.
Бунга жавобан Миланович Пленкович "ўзини Украина агентидек" тутаётганини айтиб, ўз сўзларидан тонмаслигини маълум қилган.
